ఈ రిస్క్ ఎందుకు విక్రమ్?

ఇండియాలో వెర్సంటైల్ యాక్టర్ గా తనకంటూ ప్రత్యేకమైన ఇమేజ్ క్రియేట్ చేసుకున్న నటుడు చియాన్ విక్రమ్. అతను ఏ క్యారెక్టర్ చేసిన దానికి 100 శాతం పూర్తిస్థాయిలో న్యాయం చేస్తాడు. సినిమా చూస్తున్నంత సేపు అతను చేసిన పాత్ర మాత్రమే కనిపిస్తుంది తప్ప విక్రమ్ ఎక్కడా కనిపించడు. అంతలా ప్రేక్షకులని తాను చేసిన పాత్రలకి కనెక్ట్ అయ్యేలా విక్రమ్ నటిస్తాడు. అందుకే బెస్ట్ యాక్టర్స్ లలో అతను ఒకడుగా ఉన్నాడు.

క్యారెక్టర్ డిమాండ్ చేస్తే జీరో సైజ్ లోకి మారిపోతాడు. కావాలంటే భారీకాయుడుగా బాడీ బిల్డ్ చేసి కనిపిస్తాడు. శరీరంపై కాస్ట్యూమ్స్ లేకుండా నటించాలన్నా సిద్ధంగా ఉంటాడు. ఇప్పుడు అలాంటి మరో విలక్షణమైన పాత్రని తంగలాన్ మూవీలో చేశాడు. పా రంజిత్ దర్శకత్వంలో తెరకెక్కుతోన్న ఈ మూవీ షూటింగ్ ఎప్పుడో కంప్లీట్ అయ్యింది. చిత్రంలో తంగలాన్ అనే ఆదిమ ఆటవిక కమ్యూనిటీకి చెందిన నాయకుడిగా చియాన్ విక్రమ్ కనిపిస్తున్నాడు.

ఇప్పటికే ఈ మూవీ నుంచి వచ్చిన టీజర్ ఆకట్టుకుంది. అయితే ఈ సినిమా పోస్ట్ ప్రొడక్షన్ వర్క్ కంప్లీట్ కాకపోవడంతో ఇప్పటికే నాలుగు సార్లు వాయిదా పడింది. గత ఏడాదిలోనే ఫస్ట్ రిలీజ్ డేట్ కన్ఫర్మ్ చేశారు. తరువాత సంక్రాంతికి అని చెప్పారు. ఆ తరువాత మరో రెండు సార్లు రిలీజ్ వాయిదా పడుతూ వచ్చింది. దీంతో సినిమాపై హైప్ తగ్గిపోయింది. ఇలాంటి సమయంలో తాజాగా మూవీ రిలీజ్ ని ఖరారు చేసినట్లు టాక్ వినిపిస్తోంది. జూన్ 20న పాన్ ఇండియా లెవల్ లో రిలీజ్ చేయాలని అనుకుంటున్నారంట. అఫీషియల్ గా చిత్ర యూనిట్ అయితే ఇంకా కన్ఫర్మ్ చేయలేదు. జూన్ 27న కల్కి2898ఏడీ మూవీ రిలీజ్ కాబోతోంది. ఈ చిత్రానికి వారం ముందుగానే తంగలాన్ రానుంది. సినిమాకి పెట్టిన పెట్టుబడిలో మెజారిటీ షేర్ వారంలోనే కలెక్ట్ చేసేయాలి.

కల్కి 2898ఏడీ రిలీజ్ అయితే బజ్ మొత్తం ఈ చిత్రానికి వచ్చేస్తుంది. వారం ముందు నుంచే ఆ సినిమా ట్రైలర్ హడావుడి కూడా ఉంటుంది కాబట్టి లైమ్ లైట్ లోకి రావడం కష్టం. ఇక ఓ వర్గం మిడిల్ క్లాస్ ఆడియెన్స్ కూడా వచ్చే వారం కల్కి ఉంది కదా అనే ఆలోచనకు రావచ్చు. దీంతో తంగలాన్ కోసం చిత్ర యూనిట్ అనుకుంటున్న రిలీజ్ డేట్ కాస్తా రిస్క్ తో కూడుకున్నదనే మాట వినిపిస్తోంది. అయితే తమిళ ఆడియన్స్ కల్కి కంటే తంగలాన్ కి మొదటి ప్రాధాన్యత ఇస్తారని భావించి ఆ డేట్ కి పా రంజిత్ ఫిక్స్ అయ్యాడా అనే డౌట్ కూడా క్రియేట్ అవుతుంది. ఏది ఏమైనా చిత్ర యూనిట్ నుంచి అఫీషియల్ గా రిలీజ్ డేట్ కన్ఫర్మ్ అయితేగాని తంగలాన్ భవిష్యత్తు ఏంటనేది తెలియదు. ఇక టాక్ హై రేంజ్ లో ఉంటే తప్ప నిలదొక్కుకోవడం కష్టం.